काठमाडौं
नेपाल आदिवासी जनजाति महासंघका पूर्व महासचिव आङकाजी शेर्पा १२ दिनपछि रिहा भएका छन् । जिल्ला अदालत काठमाडौंले शेर्पालाई भदौ २८ गते २० हजार रुपैयामा धरौटीमा रिहा गर्न आदेश दिएको हो । आदेश लगतै तोकिएको धरौटी बुझाएर उनी रिहा भएका हुन् ।
फेसबुक स्टाटसमा गलत अफवाह फैलाएको आरोपमा शेर्पालाई प्रहरीले भदौ १६ गते बौद्धबाट गिरफ्तार गरेको थियो । उनी विरुद्ध साइबर क्राइममा मुद्दा चलाइएको थियो । न्यायाधीश शिशिरराज ढकालको इजलासले शेर्पालाई २० हजार रुपैया धरौटीमा रिहा गर्न आदेश दिएको हो । उनलाई ठूलो संख्यामा शुभेच्छुकहरुले जिल्ला अदालत काठमाडौं परिसरमा खादा ओढाएर स्वागत गरेका थिए । उनलाई रिहा गर्न दवावका कार्यक्रम गरिदै आएको थियो ।
