किरात याक्थुङ चुम्लुङ यूकेको भ्रातृ संस्था “केवाईसी यूके वेन्छा चुम्भो” द्वारा याक्थुङ विद्वान इमानसिंह चेम्जोङको स्मृतिमा आयोजित विश्वव्यापी साम्लो (गीत) तथा सामईत्ला (कविता) प्रतियोगिता को नतिजा सार्वजनिक गरिएको छ ।
केवाईसी यूके वेन्छा चुम्भोका अध्यक्ष हाङ्मा लाओतीको अध्यक्षतामा सम्पन्न उक्त कार्यक्रममा प्रमुख अतिथि केवाईसी यूकेकी अध्यक्ष कमला सेन्दाङ, निर्णायकहरू सुवर्ण नेम्बाङ र निशेष आङ्देम्बे, वेन्छा चुम्भोका सचिव सुरेन्द्र थेबेको उपस्थिति रहेको थियो । कार्यक्रमको सञ्चालन वेन्छा चुम्भो भाषा–संस्कृति विभाग प्रमुख टेक माबोहाङले गर्दै प्रतियोगिताको नतिजा सार्वजनिक गर्नुभएको थियो ।
विश्वव्यापी रूपमा आयोजित उक्त प्रतियोगितामा १८ देखि ४० वर्षसम्मका युवा (एडल्ट) तथा १७ वर्षसम्मका बालबालिका गरी दुई उमेर समूहमा गीत र कविताका विधामा सहभागिता रहेको थियो । नेपाल, युके, भारतको सिक्किम र अरुणाञ्चल प्रदेश लगायत विभिन्न स्थानबाट याक्थुङ युवा–युवती तथा बालबालिकाको सहभागिता रहेको प्रतियोगितामा रचना याक्थुङ (लिम्बू) भाषा, संस्कृति, इतिहास, मुन्धुम, परम्परा तथा ज्ञानमा आधारित हुनुपर्ने मापदण्ड तोकिएको थियो ।
१७ जनवरी २०२६ मा आयोजित विशेष कार्यक्रममार्फत सार्वजनिक नतिजाअनुसार युवा (एडल्ट) कविता विधातर्फ हाङ्मोती सुब्बा (तबेबुङ), सिक्किम प्रथम, सेसेक्ना नेयोङहाङ, युके द्वितीय, बुधी दास पन्धाक, सिक्किम तृतीय हुनुभएको छ । साथै नाइना तुम्बाम्फे, अरुणाञ्चल, ओन्छा हाङ थेगिम, इलाम र सुम्निमा येङ्देन, युके ले सान्त्वना पुरस्कार प्राप्त गर्नुभएको छ ।
युवा साम्लो (गीत) विधातर्फ पूजा सेवाहाङ मैनाम, पाँचथर प्रथम र मिलन आङ्देम्बे, पाँचथर द्वितीय हुनुभएको छ ।
बालतर्फ साम्यित्ला (कविता) विधामा युनिशा नेम्बाङ, पाँचथर प्रथम, कृतिका नेम्बाङ, पाँचथर द्वितीय, लाजिमा फेजोङ, पाँचथर तृतीय तथा मिम्शा माबोहाङ, युकेले सान्त्वना पुरस्कार प्राप्त गर्नुभएको छ । त्यसैगरी बाल साम्लो (गीत) विधातर्फ सचिना हाङ्सरुम्बा, पाँचथर प्रथम हुनुभएको छ ।
कार्यक्रममा प्रमुख अतिथि कमला सेन्दाङले केवाईसीको मूल उद्देश्य ४ पी — Preserve, Promote, Practice and Pass On बारे स्पष्ट पार्दै भाषा र संस्कृतिको संरक्षणमा युवा पुस्ताको भूमिकामाथि जोड दिनुभयो । साथै यो ऐतिहासिक कार्यको लागि आफ्नो भातृ संगठन वेन्छा चुम्भो तथा समिती सदस्यहरू, निर्णयकहरू, प्रतियोगीहरू तथा सम्पुर्णलाई धन्यवाद समेत व्यक्त गर्नु भयो ।
निर्णायक सुवर्ण नेम्बाङले सबै सिर्जना अत्यन्त उत्कृष्ट रहेको र अत्यन्त सानो अन्तरका आधारमा विजेता छनोट गर्नुपरेको बताउँदै सबै सहभागी नै विजेता भएको धारणा राख्नुभयो । अर्का निर्णायक निशेष आङ्देम्बेले विश्वव्यापी रूपमा विशेषगरी बालबालिकाको सहभागिता न्यून रहेकोप्रति चिन्ता व्यक्त गर्दै भावी पुस्तामा भाषा, संस्कृति र इतिहास हस्तान्तरण गर्न नसकिए गम्भीर समस्या उत्पन्न हुने उल्लेख गर्नुभयो दिनुभयो ।
कार्यक्रमको समापन गर्दै वेन्छा चुम्भोका अध्यक्ष हाङ्मा लाओतीले विश्वभर छरिएर रहेका याक्थुङ युवालाई आफ्नै संस्कृति र पहिचानप्रति जागरुक गराउने उद्देश्यले यस्ता कार्यक्रम आयोजना गरिएको बताउनुभयो । साथै केवाईसी यूकेको युवा शाखा भएकै कारण युवामै केन्द्रित कार्यक्रमहरू अघि बढाइएको उल्लेख गर्दै प्रत्यक्ष–अप्रत्यक्ष रूपमा सहयोग गर्ने सबैप्रति आभार व्यक्त गर्नुभयो । उहाँले सम्पूर्ण सहभागी प्रतियोगीलाई बधाई तथा शुभकामना दिँदै कार्यक्रम समापन गर्नुभएको थियो ।
