एशियाका आदिवासी जनजातिहरुको साझा संस्था एशिया इन्डिजिनियस पिपल्स प्याक्ट (एआइपीपी) को अध्यक्षमा फिलिपिन्सकी आदिवासी अधिकारकर्मी बेभरली लोंगिद निर्वाचित हुनु भएको छ । जुनको ३ देखि ५ तारेखसम्म थाइल्याण्डको चियाङमाइमा सम्पन्न एआइपीपीको नवौ महासभाले लोगिद निर्वाचित हुनु भएको हो । १४ वटा एशियाली मुलुकका प्रतिनिधिहरुले उहाँलाई सर्वसम्मतीले निर्वाचित गरेको हो ।
कार्यकारी सदस्यमा भने विभिन्न मुलुकका प्रतिनिधि निर्वाचित हुनु भएको छ । नेपालबाट नेपाल आदिवासी जनजाति महासंघका पूर्व अध्यक्ष जगत बहादुर बराम कार्यकारी सदस्यमा दोहोरिनु भएको छ । उहाँ यस अघिको कार्यकालमा पनि हुनु हुन्थ्यो ।
भारतबाट मीना कुमारी एक्का, बंगलादेशबाट पल्लब चक्मा कार्यकारी सदस्यमा निर्वाचित हुनु भएको छ । यसरी नै एआइपीपीको बोर्ड सदस्यमा युवा प्रतिनिधिका रुपमा इन्डोनेशियाका भेनीदियो नालार्दिसा, पूवी एशिया जापान, ताइवान र चीनका प्रतिनिधिका रुपमा ताइवानकी सु हसिन थाइलैण्ड, लाओस, कम्वोडिया, भियतनाम, म्यानमार (बर्मा)को प्रतिनिधिका रुपमा कम्वोडियाका हेयन बुनाइङ र थाइलैण्डकी निताया इर्कान्ना निर्वाचित हुनु भएको छ । दक्षिण पूर्वी एशिया मलेसिया, इन्डोनेसिया, फिलिपिन्स र टिमोरको प्रतिनिधित्व गर्दे इन्डोनेसियाका अवडोन नवाबान र मलेसियाकी हेलन इम्पाइङ कार्यकारी सदस्यमा निर्वाचित हुनु भएको एआपीपीले जनाएको छ ।
एशियाका आदिवासीहरुको साझा संस्था एआइपीपीको ३० बर्षको इतिहासमा अध्यक्षमा निर्वाचित हुने फिलिपिनको इगोरेट समुदायकी पहिलो महिला हुनु हुन्छ । निर्वाचित अध्यक्ष लोगिद् फिलिपिन्सको माउन्टेन प्रान्तको सगाडा र अलाबस्थित बोंतो–कन्कानेय आदिवासी समुदायकी सदस्य हुनुहुन्छ । उहाँ कोर्डिलेरा ह्युमन राइट्स एलायन्सकी संस्थापक सदस्य, कोर्डिलेरा पीपुल्स एलायन्सकी पूर्व अध्यक्ष र अन्तर्राष्ट्रिय आदिवासी आत्मनिर्णय तथा मुक्तिको लागि आन्दोलनकी विश्व समन्वयकर्ता पनि हुनु हुन्छ ।
अध्यक्ष लोंगिदले सन् २०२८ मा हुने एआपीपीको महासभा फिलिपिन्समै आयोजना गर्ने प्रस्ताव राख्नु भएको छ । लामो समयदेखि सरकारी उत्पीडन र ‘रेड ट्यागिङ’ (कम्युनिस्टको आरोप) को सिकार बन्नु भएकी लोगिद् मानव अधिकारका लागि लामो समयदेखि संघर्षरत हुनुहुन्छ ।
एआइपीपीमा नेपाल आदिवासी जनजाति महासंघ, नेपाल आदिवासी जनजाति महिला महासंघ, नेपाल आदिवासी अपाङ संघ, आदिवासी जनजाति गैह्सरकारी संस्था महासंघ (एनजिओ फोनिन्) र नेपाल आदिवासी जनजाति युवा महासंघ सदस्य संस्था महासभाका सदस्य छन् ।
एआईपिपी संयुक्त राष्ट्र संघको सामाजिक तथा आर्थिक परिषदमा जुलाई २०१२ देखि बिशेष परामर्शदात्री गैरसरकारी संस्थाकोरुपमा अनुमोदित भएको संस्था हो । यसरी नै जलवायु सम्बन्धि संयुक्त राष्ट्र संघिय कार्यढाचा महासन्धि मा सन्२०११ र संयुक्त राष्ट्र संघिय विश्व बौद्धिक सम्पति संगठनमा सन्२०१२ जुलाईमा अनुमोदन भएको संस्था हो ।
एआइपीपी आदिवासीहरुको अधिकार सम्बन्धमा संयुक्त राष्ट्र संघिय घोषणा पत्र र अन्य अन्तर्राष्ट्रिय मानव अधिकारका साधन अनुरुप उनीहरुको पहिचान, सामुहिक अधिकार र बैधानिक मान्यता दावीका साथ एशियाका आदिवासीहरुको आधारभुत स्वतन्त्रता र मानव अधिकारको रक्षा र प्रबद्र्धन गर्न उनीहरुलाई शशक्तिकरण गर्ने कार्य गर्ने उघेश्यले खोलिएको हो ।
