आदिवासी जनजाति उत्थान राष्ट्रिय प्रतिष्ठानको उपाध्यक्ष पदमा ३ जनाको नाम सिफारिस भएको छ । संघिय मामिला तथा समान्य प्रशासन मन्त्री राजकुमार गुप्ताको संयोजकत्वमा गठित उपाध्यक्ष सिफारिस समितिको भदौ १७ गते बसेको बैठकले प्रतिष्ठानका अध्यक्ष तथा प्रधानमन्त्री केपी शर्मा ओलीलाई सो सिफारिस गरेको हो ।
सिफरिसमा पर्नुहुनेमा लोकतान्त्रीक आदिवासी जनजाति महासंघका अध्यक्ष पासाङ शेर्पा, तमु ह्युल छोजं धिका निर्वतमान अध्यक्ष रेशम गुरुङ र संविधान सभा सदस्य टाशी स्याङ्मो गुरुङसेनी हुनुहुन्छ । ताप्लेजुङ जिल्ला मिक्वाखोला गाउँपालिका वडा न. ५ निवासी शेर्पा नेपाल आदिवासी जनजाति महासंघका पनि पूर्व अध्यक्ष हुनुहुन्छ ।
त्यसैगरी गण्डकी ६ गोरखाका रेशम गुरुङ लामो समय देखि आदिवासी आन्दोलनमा सक्रिय हुनुहुन्छ । मुस्ताङ बाह्रगुङ गाउँपालिकाकी गुरुङसेनी लोपोन्मूख आदिवासी बाह्रगाउँ समाज सेवा समितिकी अध्यक्ष हुनुहुन्छ ।
सरकारले आदिवासी जनजाति उत्थान राष्ट्रिय प्रतिष्ठान ऐनको दफा ७ को उपदफा १ बमोजिम प्रतिष्ठानको उपाध्यक्षको नाम सिफरिस गर्न मन्त्री गुप्ताको संयोजकत्वमा तीन सदस्यीय समिति बनाएको थियो । समितिमा नेपाल आदिवासी जनजाति महासंघका अध्यक्ष गेल्जे लामा शेर्पा र आदिवासी जनाजाति परिषद् सदस्य सत्यनारायण डंगोल हुनुहुन्छ ।
समितिले सिफरिस गरेको तीन जना मध्ये प्रतिष्ठानको अध्यक्ष समेत रहनुभएका प्रधानमन्त्रीले एक जनालाई नियुक्ती गर्ने प्रावधान रहेको छ । पासाङ शेर्पा एमाले निकट हुनुभएका कारण उहाँको संभावना रहेको छ भने राजनीतिक नियुक्तीको भागबन्डामा पर्न सकेमा रेशम गुरुङ पनि पर्न सक्ने अनुमान गरिएको छ ।
सिफारिस समितिमा रहेका एक जना सदस्यका अनुसार प्रतिष्ठानको इतिहासमा महिला उपाध्यक्ष हुन नसकेको पृष्ठभूमिमा टाशी स्याङ्मो गुरुङसेनीलाई नियुक्त गर्नुपर्ने दवाव परेको छ । संविधान सभा सदस्य गुरुङसेनी माओवादी छाडेर एमाले प्रबेश गर्नु भएको हुँदा उहाँलाइृ नियुक्त गर्दा पनि हुने आदिवासी महिलाहरुले जोड दिइरहेका छन् ।
तथापि शेर्पाको सम्भावना अधिक रहेको छ । संघीय मामला तथा सामन्य प्रशासन मन्त्रालयमा शेर्पाका नाममा टिप्पणी उठाइ सकिएको समाचार स्रोतको दावी छ ।
प्रधानमन्त्रीको अधिकारको विषय भएकाले यो सवालमा मन्त्री परिषद्मा प्रस्ताव लैजान नपर्ने कानुन विदहरुको भनाइ छ ।
सत्ता सझेदार नेपाली काँग्रेस र नेकपा एमाले बीच पद भागबन्डा गर्न सदस्यसचिब काँग्रेसलाई दिएर उपाध्यक्ष एमालेले राख्दा शेर्पा नै उपाध्यक्ष हुने अनुमान गरिएको छ ।
आदिवासी जनजातिको शसक्तिकरण गर्ने महत्वपूर्ण निकाय प्रतिष्ठानको उपाध्यक्ष त्यस संस्थाको कार्यकारी प्रमूख मानिन्छ ।
