बैदेशिक रोजगारबाट स्वदेश फर्किएका महिला कामदारको संस्था पौरखी नेपालको २२ औँ साधारण सभा तथा ८ औँ अधिवेशन सम्पन्न भएको छ ।
श्रम, रोजगार तथा सामाजिक सुरक्षा मन्त्री शरदसिंह भण्डारीले उद्घाटन गर्नु भएको साधारण सभामा लैंगिक अधिकार तथा नीति विशेषका चाँदनी जोशीलाई सम्मान गरिएको छ ।
लैंगिक समता र समानताको पक्षमा ५८ वर्षदेखि दक्षिण एशिया र नेपालमा निरन्तर कार्य गर्दै आउनुभएको जोशी संयुक्त राष्ट्र संघीय महिला विकास कोष (युनिफेम)को तत्कालिन क्षेत्रीय निर्देशक हुनुहुन्छ ।
यसैगरि संयुक्त अधिराज्य (वेलायत)मा रहनु भएका पुनम गुरुङलाई पौरखी दूतका रुपमा प्रमाणपत्र प्रदान गरिएको छ ।
कार्यक्रममा पौरखी नेपालको रणनीतिक सल्लाहाकार मन्जु गुरुङलाई पनि सम्मान गरिएको थियो ।
कार्यक्रममा सम्बोधन गर्दै मन्त्री भण्डारीले घरेलु कामदारलाई व्यवस्तित बनाउन सरकार लागि परेको बताउनुभयो । उहाँले वैदेशिक रोजगारमा महिलाहरु अधिकांश घरेलु कामदारमा जाने गरेको भएता पनि उनीहरुलाई तालीम, सूचनाको अभाव रहेको बताउनु हुँदै नेपालमा महिलाको वैदेशिक रोजगार प्रतिबन्धीत हुनु विडम्बनापुर्ण रहेको बताउनुभयो ।
लैंगिक अधिकार तथा नीति विशेषमा चाँदनी जोशीले महिलाका वैदेशिक रोजगारको विषय सरकारको कम प्राथमिकतामा भएकोले कतिमय नीतिहरु आझै विभेदकारी भएको बताउनुभयो ।
राष्ट्रिय महिला आयोगकी अध्यक्ष कमला पराजूली, मानव अधिकार आयोगका सचिव मुरारी प्रसाद खरेल, पौरखी नेपालकी महासचिव सिन्धु अर्याल, सुरक्षित आप्रवासनका लागि राष्ट्रि सञ्जालका अध्यक्ष चिरन्जीवी बराल समेतले बोल्नुभएको थियो ।
