राष्टिय विभूति जयपृथ्वीबहादुर सिंहको १४८औ जन्मजयन्तीका अवसरमा विभिन्न क्षेत्रका व्यक्तिहरुलाई सम्मान र पुरस्कार प्रदान गरिएको छ ।
नेपाल प्रज्ञा प्रतिष्ठान र नेपाल बाल साहित्य समाजको संयुक्त आयोजनामा भएको कार्यक्रममा समाजका संस्थापक प्रा. रामकुमार पाँडेलाई नेपाल बाल साहित्य समाज जयपृथ्वी सम्मान–२०८०“ रामेछापका आकास सुनुवारलाई रसुर्खेतकी प्रिति विकलाई पनि पुरस्कृत गरिएको थियो ।
रामेछाप जिल्लाउमाकुण्ड गाउँपालिका वडानम्बर ४ स्थित श्री चण्डेश्वरी माध्यामिक विद्यालयको कक्षा ९ मा अध्ययनरत आकास सुनुवारको सफलताको कथा नामक कथा र कविता संग्रह प्रकासित रहेको छ । तीन महिनाको अवधिमा १६ कथा र १० कविता रचना गर्न सफल सुनुवारको कथासंग्रह सामाजिक रुपान्तरण नेपाल नामक संस्थाले उमाकुण्ड बाल साहित्य महोत्सवका अवसरमा प्रकासित गरेको थियो ।
यसै गरी सुर्खेत पञ्चपुरीकी कक्षा ४की प्रिती बिकलाई गायन तर्फकाृ जयपृथ्वी बालप्रतिभा पुरस्कार समर्पण गरिएको हो ।
पुरस्कार अन्तर्गत जनही नगद ५ हजार रुपैया रहेको छ । सोही कार्यक्रममा गेहेन्द्रभूषण पोखरेलीलाई गत वर्ष प्रदान गरिएको नेपाल बाल साहित्य समाज मुकेश–जनक बालविज्ञान पुरस्कार पनि उहाँकी सुपुत्री प्रतिमा ढुङ्गानालाई हस्तान्तरण गरिएको थियो ।
सो पुरस्कारमा नगद रू १५ हजार पनि रहेकोे छ ।
नेपाल प्रज्ञा–प्रतिष्ठानका कुलपति भूपाल राई, उपकुलपति विमलकृष्ण श्रेष्ठ, समाजका संस्थापक अध्यक्ष प्रा. डा. चूडामणि बन्धु र समाजका अध्यक्ष प्रमोद प्रधानले ती सम्मान र पुरस्कार अन्तर्गतका सम्मान पत्र, दोसल्ला, खादा, माला र नगद समर्पण गर्नुभएको थियो। कार्यक्रममा हिमरश्मि विद्यालयकी छात्रा अपेक्षा बास्तोलाको कथाकृति 'भयको तस्बिर'को लोकार्पण पनि गरिएको थियो । उनी कक्षा १० मा अध्ययनरत हुनुहुन्छ ।
कार्यक्रममा कुलपति भूपाल राईले नेपाल बालसाहित्य समाज र प्रज्ञा प्रतिष्ठान मिलेर गत वर्षदेखि रचनात्मक कामहरू भैरहेको बताउनुभयो । उहाँले बालबालिकाका लागि साहित्य क्षेत्रबाट अझै महत्त्वपूर्ण काम गर्नुपर्ने आवश्यकता औंल्याउनुभयो ।
नेपाल बालसाहित्य समाजका अध्यक्ष प्रमोद प्रधानको अध्यक्षतामा भएको कार्यक्रममा नेपाल प्रज्ञा प्रतिष्ठानका कुलपति राई, उपकुलपति विमलकृष्ण श्रेष्ठ, समाजका संस्थापक अध्यक्ष डा. चूडामणि बन्धु, प्रज्ञा प्रतिष्ठानका सदस्य सचिव डा. धनप्रसाद सुवेदी र समाजका कार्यसमिति सदस्य सुशीला प्रधानाङ्गले जयपृथ्वीबहादुर सिंहको योगदानको चर्चा गर्नुभएको थियो ।
नेपाल बालसाहित्य समाजका उपाध्यक्ष डा. यादेवी ढकालले सम्मानित व्यक्तित्व एवम् पुरस्कृत बालप्रतिभाहरूबारे जानकारी दिनुभएको थियो ।
नेपाल बालसाहित्य समाजका महासचिव विजयराज आचार्यले संचालन गर्नुभएको कार्यक्रममा समाजका सचिव डा. विष्णु केसीले धन्यवाद ज्ञापन गर्नुभएको थियो । कार्यक्रममा पुरस्कृत बालप्रतिभा आकाश सुनुवारले कविता र प्रीति विकले गीत प्रस्तुत गर्नू भएको थियो ।
