काठमाडौ
नेपाल आदिवासी जनजाति महासंघका पूर्व तथा संघीय समाजवादी फोरमका नेता महासचिव आङकाजी शेर्पालाई छापामार शैलीमा पक्राउ गरिएकोमा देश विदेशमा विना शर्त रिहाइ गर्न माग गरिएको छ ।
शेर्पालाई रिहाका लागि दवाव दिन भदौ २२ गते राजधानीमा मंगलबार चक्काजाम गरिदैछ । पूर्व राजदूत डा. गणेश योञ्जनको संयोजकत्वमा बौद्धका स्थानीयबासीले शेर्पालाई ससम्मान रिहा गर्न माग गर्दै १ घण्टा चक्काजाम गर्दैछन् । साइबर क्राइमको आरोपसहित थुनामा राखिएका शेर्पाको पक्षमा बेलुकी ४ बजे देखि ५ बजेसम्म पासाङ ल्हामु चोक, चुच्चेपाटीदेखि जोरपाटी चोकसम्म चक्काजाम गरिने आयोजकहरुले जनाएका छन् ।
यसैगरी आदिवासी जनजाति महासंघ मलेसिया शाखाका अध्यक्ष दीपक तामाङद्वारा जारी विज्ञप्तिमा पनि शेर्पालाई विनाशर्त रिहाइ गर्न माग गरिएको छ ।
सिन्धुलीमा पनि रिहाइको माग
सिन्धुलीमा क्रियाशिल आदिवासी जनजाति संघ÷संस्थाले प्रहरी हिरासतमा रहेका आदिवासी जनजाति अधिकारका अभियन्ता आङ्काजी शेर्पालाई विना शर्त रिहाइ गर्न माग गरेका छन् । नेपाल आदिवासी जनजाति पत्रकार महासंघ (फोनिज) सिन्धुलीद्वारा सिन्धुलीमाढीमा भदौ २१ गते आयोजित संविधान निर्माण र आदिवासी जनजातिको सवाल विषयक साक्षत्कार कार्यक्रममा उनीहरुले सो धारणा राखेका हुन् ।
कार्यक्रममा नेपाल तामाङ घेदुङका केन्द्रीय सचिव काजीमान थिङले उत्पीडित समुदायको आक्रोश विगतको विभेदकारी राज्य व्यवस्थाको उपज भएको बताए । नयाँ संविधानमा उनीहरुले खोजेको अधिकार सुनिश्चित भएमात्र आदिवासी जनजातिको आक्रोश मत्थर हुने पनि थिङले बताए ।
नेपाल आदिवासी जनजाति महासंघ, सिन्धुलीका निवर्तमान अध्यक्ष एवम् नेकपा एमाले सिन्धुलीका सचिव सूर्य पाख्रिनले ‘अखण्ड सुदुरपश्चिम आन्दोलनले जे मागे त्यही पाइने, अखण्ड वाग्लुङ्गले जे मागे त्यही पाईने तर थारु र मधेशीले अधिकार माग्दा गोली पाए’ यो नै वर्तमान राज्यको कमजोरी हो ।
एनेकपा माओवादीका नेता सुरद स्याङ्तानले विगतमा प्राप्त आधिकारसमेत संविधानको नयाँ मस्यौदामा हटाइएकोले उत्पीडित समुदाय आक्रोशित हुनु परेको धारणा राखे । कानुन व्यवसायी अधिवक्त द्वोय सुशिला थिङ र ओमराज तामाङले कानुनी व्यवस्थाहरु शक्ति अनुकुलतामा व्याख्या र विश्लेषण गर्नले पनि समस्या आएको बताए ।
