त्रिभूवन विश्वविद्यालयको समाजशास्त्र विभागको प्रमुखमा वरिष्ठताका आधारमा सहप्राध्यापक डा. पासाङ शेर्पालाई नियुक्ती दिने त्रिभूवन विश्व विद्यालयको कार्यकारी परिषदले तयारी गरेको छ ।
विभागीप प्रमूख डा. युवराज लुइटेलको कार्यकाल समाप्त भए पछि सो पदमा नियुक्ती सम्बन्धी विवाद देखिएता पनि विश्वविद्यालयको उपकुलपति, रेक्टर र डिन सहितको कार्यकारी परिषदले डा. शेर्पालाई प्रमूखमा नियुक्ती दिने निश्कर्षमा पुगेको हो ।
यस अघि मानविकी तथा सामाजिकशास्त्र संकायकी डिन कुसुम शाक्यले दोेस्रो वरीयतामा रहेका टीकाराम गौतमलाई विभागिय प्रमुखमा नियुक्तीका लागि सिफारीस गर्नु भएको भन्दै विवाद जस्तो देखिएको थियो । तर विश्व विद्यालयको परम्परा र ज्येष्ठतालाई ख्याल गर्दै डा. शेर्पालाई नै नियुक्ती दिने तयारी गरेको स्रोतले बताएको छ ।
समाजशास्त्र विभागमा एक नम्बरमा डा. शेर्पा, दुई नम्बरमा गौतम र तेस्रो नम्बरमा मनहरि ढकाल हुनु हुन्छ ।
‘कार्यविधि अनुसार डा. शेर्पा नै विभागीय प्रमूख हुनु हुन्छ ।’ समाचार स्रोतका अनुसार अहिलेको प्रावधानलाई मिच्नेमा कोही पनि छैनन् ।
केही साता अगाडि मानविकी तथा सामाजिकशास्त्र संकायकी डिन कुसुम शाक्यले कार्यविधि मिचेर विभागीय प्रमुखको नाम सिफारिस गरेपछि नियुक्तिमा विवाद देखिएको थियो ।
डिन शाक्यले कार्यकारी परिषद्मा सिफारिस गर्ने बेला गौतमको नाम पहिलो र शेर्पाको नाम दोस्रो नम्बरमा सिफारिस गर्नुभएको थियो । गौतमलाई नियुक्ति गर्नुपर्ने कारणहरू उल्लिखित दुई पृष्ठ लामो सुझावसमेत उहाँले पेस गरेको परिषद्का एक सदस्यले बताउनुभयो ।
‘सिफारिस प्रक्रियामा नै त्रुटि भएपछि कार्यकारी परिषद्ले सच्याउने छ । यसलाई सुधार गरेर नियुक्ति हुन्छ ।’ स्रोतले भनेको छ ।
वरीयता मिचेर विभागीय प्रमुख सिफारिस भएपछि प्रगतिशील प्राध्यापक संगठनले समेत डिन शाक्यलाई भेटेर ध्यानार्कषण गराएको छ । शाक्यको कार्यकाल साउन दोस्रो साता नै सकिएको थियो । उहाँलाई उपकुलपति कार्यालयले अर्को व्यवस्था नभएसम्मका लागि कामकाज चलाउने जिम्मेवारी दिएको हो ।
यस्तो बेला मनोमानी निर्णय गर्न नमिल्ने संगठनले जनाएको छ । ‘समाजशास्त्र विभागमा मात्रै होइन । सबैतिर कार्यविधिअनुसार वरिष्ठताका आधारमा नियुक्ति हुनुपर्छ भनेका छौं,’ संगठनका महासचिव डा. पदम खतिवडाले भन्नुभयो, ‘ऐन, विधि कार्यान्वयन गर्दा राज्यले सुरक्षा दिनुपर्छ ।’
