नेपाल प्रज्ञा–प्रतिष्ठान, साहित्य (मातृभाषा) विभागले आयोजना गरेको मातृभाषा साहित्य शृङ्खला अन्तर्गत यस साता चाम्लिङ भाषामा साहित्य बिषयमा विमर्स भएको छ ।
कार्यक्रममा चाम्लिङ राईभाषाका अध्येता तिलक चाम्लिङले 'चाम्लिङ भाषाको साहित्य’ विषयक कार्यपत्र प्रस्तुत गर्नुभएको थियोे ।
कार्यपत्रमा चाम्लिङ मातृभाषाको स्थिति, काल विभाजन ,पाठयपुस्तक प्रकाशन ,पत्रपत्रिका प्रकाशन,सोसल मिडियाको प्रभाव र चाम्लिङ साहित्य कृतिलगायतका बारेमा चर्चा गरिएको छ ।
नेपाल प्रज्ञा–प्रतिष्ठानका सदस्य सचिव डा.धनप्रसाद सुवेदीले उद्घाटन गर्नु हुँदै प्रत्येक भाषाको महत्व समान हुने वताउनु भयो । उहाँले चाम्लिङ भाषाका अध्येता तिलक चाम्लिङद्वारा लिखित कार्यपत्र ’चाम्लिङ भाषाको साहित्य ’ निक्कै पठनीय र स्तरीय रहेको बताउनु भएको थियोे ।
प्रज्ञा–प्रतिष्ठानका प्राज्ञ परिषद् सदस्य तथा साहित्य (अनुवाद) विभाग प्रमुख हंसावती कुर्मीले स्वागत मनतव्यका क्रममा कार्यक्रमको ओैचित्यमाथि प्रकाश पार्दै प्रज्ञा–प्रतिष्ठान प्रत्येक मातृभाषाको उत्थान र प्रवद्र्धन गर्न लागि परेको बताउनु हुँदै मातृभाषाविना बाँच्न र जिउन कठिन हुने बताउनुभएको थियो ।
प्रज्ञा–प्रतिष्ठानका प्राज्ञ परिषद् सदस्य तथा साहित्य (मातृभाषा ) विभाग प्रमुख राजन मुकारुङले मातृभाषा भनेको आफ्नै आमाको भाषा भएकाले हामीआफैँ जागृत हुनुपर्ने बताउनुभएको थियोे ।
उक्त कार्यपत्रमाथि सहभागीका तर्फबाट बयानसिंह राई, डा. सोमबहादुर धिमाल र मानबहादुर राईले पुरक विचार राख्नुभएको थियोे ।
कार्यक्रममा मैथिली भाषामा बिजेता चौधरी ,बायुङ राई भाषामा वसन्त बायुङ राई, दुमी राई भाषामा प्रयास दुमी राईले कविता वाचन गर्नुभएको थियो । यस कार्यक्रमको सहजीकरण प्रज्ञा–प्रतिष्ठानका प्राज्ञसभा सदस्य चेतनाथ धमलाले गर्नुभएको थियोे ।
